Take a fresh look at your lifestyle.

नगर जिल्ह्याचे पालकमंत्री हसन मुश्रीफ यांच्यावर शेकडो कोटींच्या घोटाळ्याचा आरोप !

'ईडी'ला पुरावे सादर करणार : किरीट सोमय्या

 

 

मुंबई: महाविकास आघाडीच्या मंत्र्यांवर आणि नेत्यांवर भ्रष्टाचाराचे आरोप करणारे भाजप नेते किरीट सोमय्या यांनी आतापर्यंत आघाडीच्या एकूण ११ मंत्री आणि नेत्यांच्यावर भ्रष्टाचाराचे आरोप केलेले आहेत. त्यानंतर आपल्याकडे आणखी दोन मंत्र्यांची भ्रष्टाचाराची प्रकरणे असून त्यातील एका मंत्र्याचा घोटाळा आपण सोमवारी उघड करू असे सोमय्या यांनी जाहीर केले होते. त्यानुसार आज (सोमवारी ) सोमय्या यांनी राष्ट्रवादीचे राज्याचे ग्रामविकास मंत्री तथा नगर जिल्ह्याचे पालकमंत्री हसन मुश्रीफ यांचे नाव जाहीर केले आहे. किरीट सोमय्या यांनी हसन मुश्रीफ यांच्यावर मनी लाँड्रिंग, बेनामी संपत्ती गोळा करणे, तसेच इतर अनेक गैरव्यवहार करण्याचे गंभीर स्वरुपाचे आरोप केले आहेत. मुश्रीफ यांनी प्रथमदर्शनी १२७ कोटींचा घोटाळा केल्याचे स्पष्ट झाले असून हा आकडा वाढण्याची शक्यता असल्याचे सोमय्या यांनी स्पष्ट केले आहे.

या घोटाळ्यात केवळ ग्रामविकास मुश्रीफ यांचाच सहभाग नसून त्यांच्या संपूर्ण कुटुंबाचा सहभाग असल्याचे सांगत सोमय्या यांनी मुश्रीफ यांचे पुत्र नाविद मुश्रीफ आणि पत्नी साहिरा मुश्रीफ यांचीही नावे घेतील आहे. मी महाविकास आघाडी सरकारमधील ११ भ्रष्टाचारी मंत्री आणि नेत्यांची नावे आतापर्यंत जाहीर केली होती. मात्र या ११ जणांनंतर आता राखील खेळाडूंची नावे वाढत चालली आहेत. आज ग्रामविकास मंत्री हसन मुश्रीफ यांचे नाव आम्ही वाढवत आहोत, असे सांगत किरीट सोमय्या यांनी हसन मुश्रीफ कुटुंबाने शेकडो कोटींचे घोटाळे केल्याचा गंभीर आरोप केला आहे. मुश्रीफ यांनी हे घोटाळे बोगस कंपन्या, शेल कंपन्यांच्या माध्यमातून केला आहे. मुश्रीफ यांनी आर्थिक गैरव्यवहार करून बेनामी मालमत्ता कशी जमवली याबाबत २७०० पानांचे पुरावे माझ्याकडे आहेत, असे सोमय्या म्हणाले. हे सर्व पुरावे आपण आयकर विभागाकडे दिले असल्याचेही सोमय्या म्हणाले.

सोमय्या पुढे म्हणाले की, सीआरएम सिस्टम्स प्रायव्हेट लिमिटेड या कंपनीत प्रवीण अग्रवाल हे ऑपरेटर आहेत. याच कंपनीतून हसन मुश्रीफ यांचे पुत्र नाविद मुश्रीफ यांनी दोन कोटींचे कर्ज घेतले असल्याचे दाखवले आहे. याच कंपनीवर सन २०१७ -१८ मध्ये प्रतिबंध लावण्यात आला होता. तेव्हा काहींवर कारवाई देखील सुरू झाली होती. याच कंपनीतून नाविद यांनी निवडणुकीसाठी फॉर्म भरला होता. सीआरएम कंपनीत २ कोटी ४५ लाख ३५४ इतकी रक्कम असल्याचे नाविद यांच्या निवडणूक प्रतिज्ञापत्रात दाखवण्यात आले आहे. ही कंपनी शेल कंपनी असल्याचे सिद्ध झाले आहे.

ग्रामविकास मंत्री यांच्या भ्रष्टाचाराचे सर्व पुरावे आपल्याकडे असून उद्या मी हे सर्व पुरावे मुंबईतील ईडीच्या कार्यालयात सादर करून अधिकृत तक्रार देणार आहे. तसेच परवा दिल्लीला जाऊन अर्थ मंत्रालय आणि तेथील ईडीकडे मी हे सर्व पुरावे सादर करणार आहे, असे किरीट सोमय्या यांनी म्हटले आहे.