Take a fresh look at your lifestyle.

विखेंकडे भरपूर ‘बॅलन्स’ असल्यानेच ते निवांत झोप येणाऱ्या पक्षात !

पालकमंत्री हसन मुश्रीफ यांचा टोला.

 

राज्याचे : ग्रामविकास मंत्री तथा अहमदनगर जिल्ह्याचे पालकमंत्री हसन मुश्रीफ यांच्यावर भाजप नेते किरीट सोमय्या यांनी केलेल्या आरोपाचा धागा पकडून नगर दक्षिणचे भाजपचे खासदार डॉ. सुजय विखे पाटील यांनी मुश्रीफ यांच्यावर टीका केली होती. ‘मुश्रीफ सध्या आपले बॅलन्सशीट तपासण्यात व्यस्त असावेत, त्यामुळे ते नगरला येत नाहीत,’ असे विखे म्हणाले होते. विखे यांच्या या टीकेला मुश्रीफ यांनी उत्तर दिले. ते म्हणाले, ‘विखे सध्या निवांत झोप येणाऱ्या पक्षात आहेत. त्यांच्याकडे बॅलन्सही भरपूर असेल. आमच्याकडे मात्र सीट आहे बॅलन्स नाही, त्यामुळे त्याची चिंता आम्ही करीत नाही.’
पालकमंत्री मुश्रीफ दोन दिवसांच्या नगरच्या दौऱ्यावर आले होते. शनिवारी जिल्हाधिकारी कार्यालयात त्यांनी आढावा बैठक घेतली. त्यानंतर आयोजित पत्रकार परिषदेत त्यांनी कोरोना संबंधीच्या उपाययोजना, संभाव्य तिसऱ्या लाटेची तयारी, अतिवृष्टीग्रस्तांना देण्यात येणारी मदत यासंबंधी माहिती दिली. नगरचे पालकमंत्री पद सोडण्यासंबंधी ते म्हणाले, ‘दोन्ही जिल्ह्यांत एका मंत्र्याला काम करणे शक्य नाही, त्यामुळे आपण यासंबंधी पक्षाच्या बैठकीत चर्चा केली आहे. त्यावर वरिष्ठांनी निर्णय घ्यायचा आहे. मात्र, जोपर्यंत निर्णय होत नाही, तोपर्यंत सोपविण्यात आलेली ही जबाबदारी आपण निष्ठेने निभावणार आहे. केवळ मीच नाही, तर आणखी काही मंत्र्यांचा हाच प्रश्न आहे. निवडणुकांच्या काळात एकेका जिल्ह्याची जबाबदारी असल्यास सोयीचे पडणार आहे.’
राज्यात प्रमुख महापालिकांच्या निवडणुका येत्या काळात होणार आहेत. त्यावरही मुश्रीफ बोलले. येणाऱ्या निवडणुकांमध्ये शक्य तेथे महाविकास आघाडी होईल. स्थानिक पातळीवरील परिस्थिती पाहून निर्णय घेतले जातील. जे मंत्री भाजप आणि केंद्र सरकार विरोधात बोलत आहेत, त्यांच्यावर भाजपकडून आरोप केले जात आहेत. आपल्यावरही याच कारणातून आरोप होत आहेत. आता मात्र सगळे मिळून भाजपचा हा डाव हाणून पाडणार आहोत, असे मुश्रीफ म्हणाले.
आमचे सरकार आल्यानंतर काही काळातच कोरोना संकट आले. त्यानंतर चार चक्रीवादळे आणि अतिवृष्टीचे संकट आले. या अपत्तीत सरकारला मोठा खर्च करावा लागला. त्यामुळे इतर कामांना निधी राहिला नाही. आता सर्व पूर्वपदावर येत आहे. त्यामुळे महसूलही वाढत असून रखडलेली कामे मार्गी लागतील, असा विश्वास मुश्रीफ यांनी व्यक्त केला.