Take a fresh look at your lifestyle.

यंदाची दिवाळी निर्बंधमुक्त होणार ?

मुख्यमंत्र्यांची आज टास्क फोर्ससोबत बैठक.

मुंबईः राज्यात कोरोना रुग्णांची संख्या आता आटोक्यात येत आहे.आरोग्यमंत्री राजेश टोपे यांनी कालच राज्यातील कोरोना निर्बंध शिथिल करण्याबाबत संकेत दिले होते. दिवाळीच्या मुहूर्तावर राज्यातील निर्बंधांबाबत अटी नियम शिथिल होण्याची शक्यता आहे. राज्याचे मुख्यमंत्री उद्धव ठाकरे यांच्या अध्यक्षतेखाली आज एक मोठी बैठक होणार आहे.

राज्यात कोरोनाची दुसरी लाट ओसरली आहे. कोरोना रुग्णांच्या संख्येत मोठी घट होत असल्याने काही प्रमाणात निर्बंध शिथिल करण्यात आले आहेत. दुकानं, बार, रेस्टॉरंट आणि मॉल्सच्या निर्बंधात काही प्रमाणात शिथिलता देण्यात आली आहे. सध्या लशीचे दोन डोस घेतलेल्या नागरिकांना मॉलमध्ये प्रवेश देण्यात येत आहे. त्याप्रमाणेच लशीचा एक डोस घेतलेल्या लोकांनाही निर्बंधात सूट देण्यात येणार असल्याची चर्चा आहे.
मुख्यमंत्री उद्धव ठाकरे यांच्या अध्यक्षतेखाली कोरोना टास्क फोर्ससोबत आज बैठक आयोजित करण्यात आली आहे. या बैठकीला टास्क फोर्सचे वरिष्ठ डॉक्टर व अधिकारी उपस्थित राहणार आहेत. दिवाळीच्या पार्श्वभूमीवर करोना नियमांबाबत महत्त्वाचा निर्णय घेण्यात येणार असल्याची चर्चा आहे.
सण- समारंभाच्या काळात लोक मोठ्या प्रमाणात खरेदीसाठी बाहेर पडतात. मागील वर्षी करोना संकटामुळं ऐन दिवाळीत कठोर निर्बंधांमुळं व्यापाऱ्यांना मोठा फटका बसला होता. त्यामुळं यंदा निर्बंधात शिथिलता द्यावी, अशी व्यापाऱ्यांची मानसिकता आहे. या सर्व पार्श्वभूमीवर दुकानं, बार, रेस्टॉरंट, मॉल्सच्या वेळेची मर्यादा वाढवली जाण्याची शक्यता आहे. त्याबाबतचा निर्णय काही दिवसांत जारी होण्याची शक्यता आहे. सरकारकडून एक – दोन दिवसांत अधिसूचना जारी करण्यात येणार असल्याची सूत्रांची माहिती आहे.
कोरोना लशीचा एक डोस घेतलेल्या नागरिकांना लोकलप्रवासास मुभा देण्याची शक्यता आरोग्यमंत्री राजेश टोपे यांनी व्यक्त केली होती. याबाबतही आजच्या टास्क फोर्सच्या बैठकीत चर्चा होण्याची शक्यता आहे. लशीचे दोन डोस घेतलेल्यांना सध्या लोकल प्रवासाची मुभा देण्यात आली आहे. मात्र, या निर्णयावर अनेकांनी नाराजी व्यक्त केली होती. सध्या मुंबईच्या रुग्णसंख्येतही झपाट्याने घट होत आहे. काल मुंबईत शून्य कोरोना रुग्णांच्या मृत्यूची नोंद झाली होती. त्यामुळे ज्यांचा एक डोस झालेला आहे त्यांनाही काही नियम अटींवर प्रवासाची परवानगी मिळेल अशी चर्चा आहे.