Take a fresh look at your lifestyle.

राधाकृष्ण विखेंचा गौप्यस्फोट : जिल्ह्यातील एक मोठा मंत्री भ्रष्टाचारात अडकलेला !

महसूलमंत्री बाळासाहेब थोरातांकडे अंगुलीनिर्देश.

0
श्रीरामपुर : राज्यातील महाविकास आघाडी सरकारमधील मंत्री व दलालांचे साटेलोटे दररोज समोर येत आहेत. अहमदनगर जिल्ह्यातील एक मोठा मंत्रीही भ्रष्टाचारात अडकला आहे. कुणी किती ‘महसूल’ गोळा केला हे ज्यावेळी बाहेर येईल त्यावेळी लोकांच्या लक्षात येईल, असा गौप्यस्फोट आ. राधाकृष्ण विखे पाटील यांनी केला. त्यामुळे हा अंगुलीनिर्देश महसूलमंत्री बाळासाहेब थोरात यांच्याकडे असल्याची चर्चा सुरू होती.
 ‘नगर जिल्ह्यातील एका मंत्र्याच्या पापाचा घडा भरला असून कोणी किती महसूल गोळा केला. हे आपोआप समोर येईल,’ असे सूचक वक्तव्य विखे पाटील यांनी केलं आहे. विखे पाटील यांनी कोणाचेही नाव घेतले नाही. मात्र, त्यांचा रोख महसूलमंत्री बाळासाहेब थोरात यांच्याकडे असल्याचे दिसून येते. श्रीरामपूरमध्ये पत्रकारांशी बोलताना विखे पाटील यांनी हा आरोप केला. हा मंत्री कोण, असे पत्रकारांनी विचारले असता ‘जरा सबुरीने घ्या, लवकरच नाव उघड होईल,’ असेही विखे पाटील म्हणाले.
काही दिवसांपूर्वीच विखे पाटील आणि मंत्री थोरात यांनी एकमेकांवर समन्यायी पाणीवाटप कायद्यावरून टीका केली होती. थोरात यांनी केलेल्या टीकेसंबंधी विचारले असता विखे यांनी त्यांना फार महत्व देत नाही, असे म्हणून उत्तर देणे टाळलं. मात्र, पुढे बोलताना विखे पाटील म्हणाले, ‘महाविकास आघाडीच्या मंत्री व दलालांचे साटेलोटे रोज समोर येत आहे. राज्यातील काही प्रकरणे उघड झाल्यानंतर आता नगर जिल्ह्यातील एक मोठा मंत्री अडकलेला असल्याचं लवकरच समोर येईल. संबंधित प्रकरणाची चौकशी सुरू आहे. आता ते ईडी आणि सीबीआयवर आरोप करू लागतील. आपली पापे झाकण्यासाठी तपास यंत्रणांवर आरोप केले जात आहेत. या संस्थांना बदनाम करून आपली पापे त्यांना झाकता येणार नाहीत,’ असेही विखे पाटील म्हणाले.
दरम्यान, ‘महाविकास आघाडी सरकार भ्रष्टाचारात अडकलं आहे. मोठमोठ्या हॉटेलात आता सरकारच्या दलालांचे अर्थिक व्यवहार होत आहेत. राज्य सरकार करोना प्रतिबंधक लस खरेदी करायला निघाले होते. मात्र, केंद्र सरकारनेच ही लस मोफत पुरवली. त्यामुळे राज्य सरकारचा त्यासाठी तयार केलेला चेक कुठे हरवला हे शोधावे लागेल,’ असा टोलाही विखे पाटील यांनी लगावला आहे.
Leave A Reply

Your email address will not be published.