Take a fresh look at your lifestyle.

प्रतिक्षा संपली ! राज्यातील कॉलेज “या” दिवशी उघडणार !

'अशी' असणार नियमावली.

 

मुंबई : राज्यातील आठवी ते बारावीपर्यंतचे वर्ग प्रत्यक्ष सुरू झाले, मात्र कॉलेज कधी सुरू होणार याबाबतची उत्सुकता विद्यार्थ्यांसह पालकांमध्येही होती. मात्र ही प्रतिक्षा आता संपली असून राज्यातील सर्व महाविद्यालये येत्या २० ऑक्टोबर २०२१ पासून सुरू करण्यात येणार आहेत, अशी महत्त्वपूर्ण घोषणा राज्याचे उच्च आणि तंत्र शिक्षणमंत्री उदय सामंत यांनी आज (बुधवारी) पत्रकार परिषदेत केली. मात्र ५० टक्के किंवा त्यापेक्षा अधिक उपस्थितीने कॉलेज सुरू करायचे वा नाही याबाबतचा निर्णय स्थानिक प्राधिकरणाशी विचार विनिमय करून विद्यापीठांनी घ्यायचा आहे, असेही सामंत यांनी सांगितले.

ज्या विद्यार्थ्यांचे लसीकरण पूर्ण झाले आहे, अशा विद्यार्थ्यांनाच महाविद्यालयात बोलवावे, अशा राज्य सरकारच्या स्पष्ट सूचना आहेत.
५० टक्क्यांपेक्षा जास्त उपस्थितीनिशी कॉलेज सुरू करायचे असल्यास स्थानिक परिस्थितीचा विचार करून त्यानुसार निर्णय घ्यावा, असे सांगताना ज्या विद्यार्थ्यांचे लसीकरण पूर्ण झाले आहे, अशा विद्यार्थ्यांनाच महाविद्यालयात बोलवावे, अशा सूचना दिल्या असल्याचे सामंत यांनी सांगितले. ज्या विद्यार्थ्यांचे लसीकरण झालेले नाही, अशा विद्यार्थ्यांच्या लसीकरणासाठी महाविद्यालये आणि स्थानिक प्राधिकरणाने पुढाकार घेऊन कार्यक्रम आखावा, असेही निर्देश राज्य सरकारने दिले आहेत.

दरम्यान, ज्या विद्यार्थ्यांनी लसीचे दोन्ही डोस घेतले आहेत, अशा विद्यार्थ्यांनीही महाविद्यालयात येताना कोविड-१९ संदर्भातील आवश्यक ती काळजी घ्यायची आहे, असे या विद्यार्थ्यांना आणि त्यांच्या पालकांनाही सामंत यांनी आवाहन केले.
मुंबईची महाविद्यालये सुरू झाल्यानंतर या विद्यार्थ्यांना लोकल प्रवासाची मुभा देण्यात येणार आहे. तसा प्रस्ताव आम्ही मुख्य सचिवांना पाठवला आहे, असे सामंत यांनी सांगितले.
🔸 अशी आहे नियमावली !
▪️राज्यातील सर्व अकृषी विद्यापीठे, अभिमत विद्यापीठे, सेल्फ फायनान्स विद्यापीठे आणि संलग्न महाविद्यालये सुरू करण्यास शासनाची मान्यता, मात्र ५० टक्के किंवा त्यापेक्षा जास्त क्षमतेने वर्ग सुरू करण्याबाबतचा निर्णय स्थानिक प्राधिकरणाशी विचारविनिमय करूनच विद्यापीठ स्तरावर घ्यावा.

▪️कोविड-१९ लसीचे दोन डोस घेतलेले विद्यार्थीच प्रत्यक्ष वर्गात उपस्थित राहू शकतील.
▪️ज्या विद्यार्थ्यांना प्रत्यक्ष महाविद्यालयात उपस्थित राहता येणार नाही, त्यांना ऑनलाइन सुविधा उपलब्ध करून घ्यावी
▪️वसतीगृहे टप्प्याटप्प्याने सुरू करण्याबाबत उच्च शिक्षण संचालक, तंत्र शिक्षण संचालक यांनी आढावा घेऊन कार्यवाही करावी.
▪️ज्या विद्यार्थ्यांनी कोविड-१९ ची लस घेतलेली नाही, त्यांच्यासाठी संबंधित विद्यापीठ, महाविद्यालयांनी स्थानिक प्रशासनाशी समन्वय साधून लसीकरणाची विशेष मोहिम राबवावी आणि लसीकरण प्राधान्याने पूर्ण करून घ्यावे.

▪️विद्यापीठ, महाविद्यालयातील शिक्षक, शिक्षकेतर कर्मचाऱ्यांचे देखील लसीकरण प्राधान्याने करून घ्यावे.