Take a fresh look at your lifestyle.

खासदार डॉ. सुजय विखेंचा लॉकडाऊनला विरोध,आंदोलनाचाही इशारा !

उपमुख्यमंत्री अजित पवारांवर केले 'हे' गंभीर आरोप.

0
अहमदनगर : जिल्ह्यात कोरोनाचा संसर्ग वाढल्याने जिल्ह्यातील ६१ गावांत सोमवारपासून पुन्हा कडक लॉकडाऊन लावण्यात आला आहे. मात्र, ‘हा निर्णय अन्यायकारक असून उपमुख्यमंत्री अजित पवार यांच्या सूचनेनुसार पुणे व नाशिकला वाचविण्यासाठी नगर जिल्ह्यात लॉकडाऊन लावण्यात आला आहे,’ असा गंभीर आरोप भाजपाचे खासदार डॉ. सुजय विखे पाटील यांनी केला आहे. 

नगर जिल्ह्यात सर्वाधिक आमदार राष्ट्रवादी काँग्रेसचे आहेत, त्यामुळे त्यांनी याविरुद्ध भूमिका घ्यावी अन्यथा आम्ही भाजपतर्फे आंदोलन सुरू करू,’ असा इशाराही विखे पाटील यांनी दिला.
जिल्ह्यात लॉकडाऊन लावण्यात आलेल्या गावांमध्ये विखे पाटील यांच्या लोणी गावाचाही यामध्ये समावेश आहे. त्यांच्या मतदारसंघातील अनेक गावेही बंद ठेवण्यात आली आहेत. या पार्श्वभूमीवर प्रशासनाने लॉकडाऊनसंबंधी लावलेले निकष चुकीचे असून ते बदलण्यात यावेत, अशी मागणी विखे यांनी जिल्हाधिकाऱ्यांना भेटून केली. त्यानंतर प्रसारमाध्यमांशी बोलताना विखे पाटील यांनी उपमुख्यमंत्री अजित पवार यांच्यावर आरोप केला.

नगरमध्ये लॉकडाऊन करण्याच्या सूचना उपमुख्यमंत्री पवार यांनी दिल्याचे आपल्या वाचनात आले. पुणे व नाशिकमध्ये रुग्ण वाढत असल्याने त्यांनी नगरला लॉकडाऊन करणे भाग पाडल्याचे यावरून दिसून येते. वास्तविक नगर जिल्ह्यात सर्वाधिक आमदार राष्ट्रवादीचे आहेत. तरीही चुकीचे निकष लावून येथील गावे बंद करण्यात आली. हे करतानाही सत्ताधारी पक्षांच्या तुलनेत भाजपच्या मतदारसंघावर आणखी अन्याय करण्यात आला आहे. मुळात दहा रुग्ण आढळले म्हणून गाव बंद करण्याचा निकष चुकीचा आहे. गावांची लोकसंख्या कमी जास्त असते. त्यामुळे त्या लोकसंख्येच्या टक्केवारीचा निकष लावला जाण्याची गरज असल्याचे खासदार विखे यांनी सांगितले.
कोरोनाची तिसरी लाट नगर जिल्ह्यातून येणार असे सांगत जर कोणी नगरला बदनाम करीत असेल तर ते सहन केले जाणार नाही. नगर जिल्ह्यात सर्वाधिक चाचण्या होत आहेत. त्यामुळे येथे जास्त रुग्ण आढळून येत आहेत. अन्य जिल्ह्यांत चाचण्यांचे प्रमाण कमी आहे. याचा विचार झाला पाहिजे. चुकीचे निकष लावले जात असल्याने ऐन नवरात्र काळात गावे बंद राहणार आहेत.
राज्य सरकारने शाळा आणि मंदिरे खुली करण्यास परवानगी दिली असली तरी नगर जिल्ह्यात मंदिरे खुली करायची की नाही, त्याचा निर्णय जिल्हाधिकारी घेणार असल्याचेही आम्हाला सांगण्यात आले आहे. त्यामुळे एकूणच नगर जिल्ह्याच्या बाबतीत अन्यायकारक निर्णय घेतले जात आहेत. त्यामुळे येत्या दोन दिवसांत याचा फेरविचार झाला नाही, तर भाजपतर्फे तीव्र आंदोलन करण्यात येईल, असा इशाराही सुजय विखे पाटील यांनी दिला.
Leave A Reply

Your email address will not be published.